Ngjashëm si zëdhënësi i Lëvizjes Vetëvendosje, Arlind Manxhuka edhe deputetja e këtij subjekti politik, Tinka Kurti rastin e raportuar të një skandali të pretenduar financiar ku mendohet të jetë i përfshirë si njeriu kryesor ambasadori i Kosovës në Kroaci, Martin Berishaj e që është edhe anëtar i Lëvizjes Vetëvendosje e ka lidhur me Rusinë, Serbinë, zgjedhjet në Slloveni e çka jo tjetër!
Kurti nëpërmjet një postimi në Facebook ka thënë se raportimet në Slloveni kanë të bëjnë me një fushatë zgjedhore atje.
Madje, për skandalin financiar të raportuar ajo e ka cilësuar si “të ashtuquajtur”. Fillimisht ajo ka thënë se ky raportim në Slloveni po cilësohet si sulm ndaj Golobit nga Jansha.
Së dyti, Kurti thotë se konkurrenca në sektorin e energjisë është arsye.
“Dikush do të thoshte se mediat në Kosovë e përkrahin të parën. Por jo, po del që janë me oligarkun serb. Në kohën e mungeseve të sanksioneve me Rusinë kjo ka kuptime shtesë.”, ka thënë Kurti.
Kurti i ka sulmuar rëndë mediat duke thënë se po e përkrahin oligarkun serb, ndërsa ka thënë se lajmet e mediave serbe po përkthehen pa u kontekstualizuar.
“Për ashtu hymë direkt në portalet serbe.”, ka shkruar ajo.
Ky është statusi i saj i plotë:
Éshtë e drejta e mediave të poziocionohen në fushata zgjedhore. Por është detyra e tyre të tregojnë se kë po përkrahin dhe për çfarë arsyesh. Éshtë fjala vetëm për disa prej portaleve. Nëse për zgjedhjet në Kosovë është e vështirë të tregojnë dhe duan ta kamuflojnë, atëherë mund të jenë më të qarta ta zëmë për zgjedhjet në Slloveni. Fushata zgjedhore atje mbërriu jehonën e saj edhe në Kosovë nëpërmjet të ashtuquajturit ‘skandal’ të ambasadorit Berisha. Së pari, kjo ngjarje atje po trajtohet fare pak dhe me dilemën si sulm zgjedhor i kandidatit Jansha ndaj favoritit Golobit. Së dyti, atje është më e qartë konkurrenca kryesore në sektorin e energjisë. E thjeshtë sa kjo ndarje: kompania shtetërore sllovene GEN apo e ajo oligarkut serb EFT. Dikush do të thoshte se mediat në Kosovë e përkrahin të parën. Por jo, po del që janë me oligarkun serb. Në kohën e mungeseve të sanksioneve me Rusinë kjo ka kuptime shtesë. Kush po e udhëheq këtë në Kosovë? Mediat dhe PDK. Këta të fundit po thonë Presidentja e Kryeministri nuk janë gjykatës. Ndërkohë vetë sillen si të tillë. Nëse janë, mund të japin një mendim se si me paratë e shtetit u lobua për shkëmbim territorial nëpër ambasadat tona të Republikës. Tashmë shumë çështje janë detyrë urgjente kombëtare. Që lajmet e Serbisë e të Rusisë të mos përkthehen fjalë përfjalshëm pa u kontekstualizuar është gjithashtu urgjente. Ato nuk mund të jenë burumi kryesor i mbulimit të rajonit. Për ashtu hymë direkt në portalet serbe. Kjo vlen edhe për opozitën me mungesë të theksuar të autenticitetit. Mund të mos jesh origjinal, por nuk mund të kopjosh mediat pro Vuçiqit për politikë në Kosovë. Mund ta godasësh qeverinë e Kosovës por jo duke u ofruar si mjet për Vuçiqin.
