Punonjësit e minierës së Bulqizës dërguan sot pamje të protestës që vazhdon prej 3 javësh ndaj drejtuesve të kompanisë turke që menaxhon minierën, e cila refuzon rritjen e rrogave të ulëta apo përmirësimin e kushteve te rënda të punës.
Ata ankohen për shfrytëzim dhe shkelje të të drejtave nga punëdhënësit që i paguajnë nën standarde, si dhe për mungesën totale të mbështetjes nga shteti apo sindikatat.
Zhvillimi vjen teksa nga miniera e Bulqizës rregullisht janë raportuar incidente të rënda dhe vdekje të punonjësve në galeri, prej kushteve të pasigurta e primitive në të cilat kompania operon.
Minatorët thonë se janë të ekspozuar ndaj rreziqeve të mëdha, duke qenë se kompania nuk investon në infrastrukturën e sigurisë dhe mbrojtjes së shëndetit në vendin e punës.
Minatorët kërkojnë gjithashtu një angazhim më të fortë nga qeveria për të mbrojtur të drejtat e tyre dhe për të siguruar një ambient pune të sigurt për të shmangur më tej viktimat dhe abuzimet që kanë karakterizuar këtë industri ndër vite.
Denoncimi:
“Sot ne minjeren e Bulqize serisht protest dhe asnje lloj zgjidhje spo japi ka 3 jav qe jemi protest po na shkelin me kam, na thon qe shkoni ne pun, pa marrveshje per rritjen e pagës, shteti spo merret fare me ket kompani turke”.
