Bastet dhe lojërat e fatit... dy aktivitetet e vetme shpëtimtare tek të cilat shqiptari mesatar përplasej me kokë gjatë një intervali ditor kur e kaplonte dëshira e madhe për të fituar ndonjë kacidhe duke i besuar fatit në mënyrë që të dilte nga skamja e thellë që e ka zhytur shteti.
Epo edhe kjo shpresë që i mbante gjallë, u shua nga shteti, e kështu me anë të një vendimi spontan të Ministrisë së Financave dhe drita e vetme në tentativë për të dalë nga varfëria, iu mor shqiptarëve e u bë monopol shtetëror.
Megjithatë, konceptet “baste dhe lojëra fati” për shtetin duket se paskan përkufizim teorik më të gjerë sesa aktiviteti që përkufizojnë këto terma dhe nuk do ishte çudi sikur të njoftohej azhurnimi i fjalorit të Gjuhës Shqipe me shtesa delirante dhe pasi të ndodhte kjo, ligji të mbyllte edhe subjekte të tjerë të ndryshëm në aktivitetin e tyre.
E kështu, duke i bërë gjërave një lidhje të thjeshtë, mund të argumentohet se arsyeja e vërtetë e padeklaruar në njoftimin zyrtar, qenka se AKEP vendosi të mbyllë domainin joqalbania.com (sipas asaj që i shfaq shqiptarëve kur tentojnë të hapin website-in tonë), pasi e shikonte si subjekt që ushtronte aktivitet kumari dhe i është referuar dhe ligjit.
Lojëra fati të cilës formë kjo nuk bëhet e qartë, por mbase në përkufizimin mendor të AKEP, ku lojë fati padyshim që do kenë konsideruar kumarin që i bëjnë qytetarët shtetit çdo ditë me denoncimet që bëjnë në faqen tonë, e kështu hidhen zarat për çdo Rilindas që i dalin të palarat. Kjo padyshim është lojë fati, të mendosh se kujt prej sojit mavi do i bjerë lapsi ditor...
E meqë qenka kjo arsyeja e bllokimit, atëherë po bëjmë një sy qorr po ju lëmë ta hapni të parët dorën e letrave, të prisni radhën tonë e të mësoni si luhet në një tavolinë pokeri kur të kuptoni se kujt “Dealeri”, që në këtë rast është populli, ia shpërndan “dorën” fitimtare.
