Në muajin nëntor, redaksia e JOQ Albania bëri publike historinë prekëse të Emrah 16-vjeçar, i cili vuante nga skolioza, një problem i rëndë shëndetësor që i kishte shkaktuar deformim të trupit dhe i kishte ndryshuar rrënjësisht jetën.
Për shkak të këtij deformimi, mjekët në vend refuzuan të merrnin përsipër ndërhyrjen kirurgjikale, duke e cilësuar si një problem të lindur. Në këtë pikë, Emrah, një adoleshent plot ëndrra dhe dëshirë për jetë, u detyrua të ndërpriste edhe shkollën, pasi e kishte të vështirë të ngjiste shkallët, ndërsa daljet me bashkëmoshatarët ishin bërë të pamundura.
Shpresa e vetme për të ishte një operacion jashtë vendit, por kostot ishin të papërballueshme për familjen e tij. I mbetur pa zgjidhje, Emrah vendosi të tregonte vetë historinë e tij përmes redaksisë sonë, duke kërkuar ndihmën e shqiptarëve.
Sot, nga ky 16-vjeçar na vjen një lajm i mirë dhe shpresëdhënës. Shqiptarët u bashkuan dhe treguan edhe një herë zemrën e madhe: falë solidaritetit të tyre, Emrah është nisur drejt Gjermanisë, ku do t’i nënshtrohet ndërhyrjes së shumëpritur kirurgjikale.
Në një videomesazh të dërguar nga Aeroporti i Tiranës, pak para nisjes, Emrah falënderon me mirënjohje të gjithë ata që e ndihmuan, duke shprehur dëshirën e tij më të madhe: të jetojë dhe të ëndërrojë si çdo bashkëmoshatar tjetër.
