Fondet e KQZ për zgjedhjet e 11 Majit/ 28 mijë lekë për komisonerët, 12.7 milionë lekë për partitë

Katër parti të reja që garuan në zgjedhjet e 11 majit do të shpërblehen me plot 12.7 milionë lekë nga buxheti i shtetit. Kompensim paszgjedhor, e quan KQZ, për faktin se nuk morën fonde paradhënie. “Lëvizja Shqipëria Bëhet” përfiton afro 4 milionë lekë, “Partia Mundësia” mbi 4.6 milionë, dhe dy të tjerat marrin pjesën që u takon.

Në anën tjetër të kësaj demokracie me llogari të hollë, qëndrojnë komisionarët, njerëzit që u ngritën para agimit dhe dolën nga qendrat e votimit pas mesnate, në të njëjtën karrige plastike. Shpërblimi? 15 mijë lekë të vjetra për anëtarët dhe 28 mijë për kryetarët. Një pagesë që, për shumë prej tyre, nuk mbulon as rrugën për të shkuar në qendrën e votimit.

Kjo diferencë e theksuar në trajtim ka nxitur e kritika nga vetë komisionerët, të cilët konsiderojnë pagesën qesharake dhe jo dinjitoze, duke marrë parasysh oraret e gjata dhe përgjegjësitë që kanë për të garantuar integritetin e votës. Në anën tjetër, partitë që shpërblehen me miliona nga buxheti i shtetit, në shumë raste, nuk kanë pasur nevojë të investojnë para paraprakisht në fushatë, duke përfituar pa mundim.

Në këtë kontekst, lind pyetja e madhe për transparencën dhe drejtësinë në shpërndarjen e fondeve zgjedhore, teksa komisionerët shtylla kryesore e procesit demokratik trajtohen si kosto minimale, ndërsa partitë përfitojnë miliona nga taksat e qytetarëve. Kjo tregon se në këtë sistem, nuk shpërblehet puna dhe përkushtimi, por ndikimi dhe pozicioni politik.