Kryetari i Industrisë së Turizmit të Sarandës, Arben Çipa ka sot reaguar për lirimin e dhunuesit të tij Dioment Musa, i cili megjithëse e dhunoi brutalisht u la i lirë pas 48 orësh nga gjykata.
Çipa është shprehur se ky vendim i prokurores e gjyqtares vret shpresën e qytetarëve të Sarandës, pasi personat që e kanë dhunuar janë me precedentë të mëparshëm penalë.
Gjithashtu, biznesmeni ngre pikëpyetje sesi mund të lihet i lirë një dhunues kur bashkëpunëtori i tij, është shpallur në kërkim.
“Si mund të lihet i lirë dhunuesi, kur bashkëpunëtori i tij është akoma në kërkim? Apo u la i lirë për të komunikuar dhe vepruar lehtë dhe në koordinim me personin në kërkim? Ky pretendim nga prokurorja dhe ky vendim nga gjyqtarja në fjalë kanë ngrirë shpresën e qytetarëve të Sarandës”, tha i dhunuari në reagimin e tij duke argumentuar se procedimi penal për plagosje të rëndë nuk përputhet me veprimin.
Cipa ka kërkuar më parë ndërhyrjen e shtetit pasi Saranda është duke u kontrolluar nga “të paprekshmit” e “të fortët”, të cilët janë në qendër konflikteve të pronësisë por edhe kërcënimeve të tjera ndaj qytetarëve.
Shkak i konfliktit ishte ndërtimi i një linje elektrike që po bënte Arben Çipa për të furnizuar me energji një bar restorant në zonën e Heremecit. 52-vjecari pretendon se po ndërton linjën elektrike në bazë të një projekti të OSHEE, ndërsa autorët kanë kundërshtuar, pasi aty ata “do ndërtonin një biznes”.
