Teksa jemi në ditët e fundit të 2021-it, një vit i cili ka patur mjaft zhvillime të rëndësishme në vend, në të gjitha aspektet e jetës, JOQ ALBANIA ka organizuar një sondazh online, ku të gjithë qytetarët do të kenë mundësinë për të votuar, sipas mendimit të tyre, atë që meriton të quhet "Personazhi i Vitit" për rolin, ndikimin dhe kontributin që ka dhënë gjatë 2021-it.
JOQ Albania ka përzgjedhur 12 personazhe nga fusha të ndryshme të jetës, të cilët kanë qenë protagonistë në ngjarjet më të rëndësishme që kanë ndodhur përgjatë këtyre 12 muajve. Gazetarë, sportistë, politikanë dhe njerëz të thjeshtë janë në listën që ju do zgjidhni si "Personazhin e Vitit". Emrat e disa prej personazheve janë sugjeruar nga qytetarët të cilët JOQ ALBANIA i pyeti pak ditë më parë. Votimi nis prej ditës së sotme dhe do të mbyllet në ditën e fundit të vitit, 31 dhjetor, kur do të shpallet edhe fituesi i sondazhit, i zgjedhur nga votat e gjithësecilit prej jush.
LISTA E PERSONAZHEVE
1. Elvis Naçi – Drejtuesi i Fondacionit "Firdeus", i njohur si mirëbërësi i shqiptarëve të varfër me punën e tij të palodhshme. Banesat që po ndërtohen për të prekurit nga tërmeti, nga fondacioni i tij janë drejt fundit.
2. Arjan Sala – Heroi i Heshtur! Security i një qendre tregtare, i cili dha jetën mes flakëve për të shpëtuar punonjësit që ishin bllokuar nga zjarri në magazinë.
3. Edi Rama – Kryeministri unik, që shpiku skemën e patronazhistëve duke përgjuar shqiptarët dhe pavarësisht kësaj ata i dhanë edhe mandatin e tretë.
4. Lulzim Basha – Kreu i PD-së, rekordmen për qëndrimin në opozitë dhe guximtar për ‘vrasjen’ e babit të tij politik, Sali Berisha.
5. Sali Berisha – Ish-kryeministri i Shqipërisë dhe ish-kreu i PD-së, i cili, pavrësisht se u shpall “Non-grata” nga SHBA dhe u përjashtua nga PD, arriti të mblidhte Kuvendin Kombëtar të partisë që themeloi dhe e rithemeloi me një pjesëmarrje masive.
6. Marin Mema – Gazetari, i cili u angazhua në rindërtimin e banesave të rrënuara nga tërmeti dhe arriti të dorëzonte brenda disa muajsh çelsat tek qytetarët.
7. Altin Goxhaj – Avokati i njohur në Shqipëri, i cili ngre gjithnjë zërin publikisht ndaj shkeljes të së drejtave të qytetarëve të thjeshtë nga shteti.
8. Klodian Elqeni – I riu, i cili shkelmoi shoferin e çmendur që hyri me makinë në sheshin Skënderbej duke i rrezikuar jetën qytetarëve. Ai fluturoi mbi dritaren e makinës duke neutralizuar agresorin.
9. Armando Broja – futbollisti i Kombëtares Shqiptare që po shkëlqen në kampionatin anglez. Performancë fantastike edhe me Kombëtaren shqiptare.
10. Distria Krasniqi dhe Nora Gjakova – Dy xhudistet nga Kosova që fituan medalje të artë në Lojërat Olimpike në Tokyo.
11. Albin Kurti – Kryeministri i Republikës së Kosovës, i cili fitoi zgjedhjet sërish dhe arriti të krijojë qeverinë e re në Kosovë.
12. Lylzim Sulejmani – Shqiptari nga Presheva, i cili arriti të shpëtonte 7 shqiptarë të Maqedonisë së Veriut nga autobusi, që shpërtheu në flakë në Bullgari.
