U ekzekutua nga i ati i tij/ Albert Krasniqi kishte vrarë një 17-vjeçar para disa vitesh

Albert Krasniqi, i cili u vra nga i ati i tij mbremjen e djeshme, ka qenë një person që kishte probleme me ligjin. Disa çaste më parë janë zbuluar disa detaje të reja në lidhje me të shkuarën e biznesmenit, ku thuhet se ai ka qëlluar me armë për vdekje, nxënësin e Shkollës së Mjekësisë, Dimitrije Popoviq, 17 vjeç, në qendër të Graçanicës më 5 qershor 2004. Krasniqi u dënua me nëntë vite e gjysmë burgim për vrasjen që ndodhi në një “fast food”, ku Dimitrije Popoviç u godit në kokë nga një plumb dhe vdiq në vend. Ndërkohë, në 14 vjetorin e vrasjes së djalit të saj, nëna e Dimitrijes, Jovanka, kishte thënë se ende zgjohet çdo natë në kohën kur u vra djali i saj.

Ajo mes lotësh ka treguar se:

Koha kur ai u vra ishte ora 02:15. Zgjohem çdo natë në atë kohë dhe mendoj se dikush po troket në derë. Shkoj shpesh dhe e hap derën, pastaj kthehem dhe them “jo, nuk është”. Shoh ngjashmëri te fëmijët që kalojnë këndej, të cilët duken si ai. Janë 14 vite trishtim, dhimbje, pagjumësi, duke menduar për gjithçka. Si mund të vritej një fëmijë 17-vjeçar? Ai ishte një nxënës shembullor, një fëmijë shembullor.

Kujtojmë se Albert Krasniqi u vra dje rreth orës 17:00 nga i ati i tij, Skënder Krasniqi, ish-luftëtar i UÇK-së, për shkak se ai kishte dhunuar ish-gruan e tij, Besa Gashi.