Papa Françesku dhe ish Papa Benedikti kanë marrë dozën e parë të një vaksine kundër koronavirusit. Papa 84-vjeçar dhe ish-Papa 93-vjeçar, morën vaksinën e tyre si pjesë e një programi vaksinimi të Vatikanit që filloi të mërkurën. Të dy janë të prekshëm nga infektimi me virus për shkak të moshës së tyre. Papa Françesku është ndoshta më i rrezikuar sepse një pjesë e njërës prej mushkërive iu hoq pas një sëmundjeje kur ishte i ri në Argjentinë. Benedikti është i dobët dhe vuan nga një numër sëmundjesh që lidhen me moshën e vjetër, të tilla si artriti. Ka pasur më pak se 30 raste të koronavirusit në qytetin e Vatikanit, shumica e tyre midis Gardës Zvicerane, të cilët jetojnë në një kazermë komunale. Papa Françesku tha në fundjavë se të gjithë duhet të vaksinohen.
Burimi:reuters Përktheu dhe përshtati:JOQ ALBANIA
