Lajme të mira për kampionin e boksit Klevis Celaj, i cili prej kohësh vuante në vendin tonë për disa nevoja bazë që një sportist duhet të ketë. Së fundmi Klevisi ka deklaruar se pas shumë përpjekjesh do të largohet nga Shqipëria dhe do të shkojë në Belgjikë. Në një intervistë në "VizionPlus" Klevisi tha se edhe pse do të largohet nga vendi ynë nuk do ta harrojë kurrë Shqipërinë dhe flamurin tonë kuq e zi. Besimi dhe kurajoja për të ecur përpara janë dy gjërat që e kanë "mbajtur në këmbë" kampionin që nuk ka asnjë lloj ndihme nga shteti dhe federata e boksit.
Kujtojmë se vitin e kaluar të gjithë u prekëm kur Klevisi rrëfeu për jetën e tij të vështirë dhe me shumë sakrifica dhe mundime.Boksi për të ka qënë pasion dhe “shpëtim” nga realiteti i hidhur. E ka nisur gjithçka në mënyrë autodidakte, me dy doreza dhe një thes të dhuruar nga dashamirës.Të fitonte titullin kampion kombëtar nuk ishte e lehtë. I janë dashur disa muaj stërvitje intensive dhe një dietë rigoroze për rënien nga pesha. Çelaj pas fitores së kampionatit kombëtar të boksit u shpërblye vetëm me 14 mijë Lekë, të cilat në fund nuk i dolën as për të blerë një palë doreza boksi.Për shkak të mungesës së palestrës për t'u stërvitur dhe ushtruar çdo ditë ai ka zgjedhur të stërvitet në natyrë.
