Oligarku Rrok Gjoka i “Gjoka Konstruksion” po shkatërron mjedisin

Banorët e fshatit Shkallë të Bashkisë Klos, nga i cili kalon kalon Rruga e Arbrit janë të shqetësuar nga veprimet e kompanisë që po ndërton këtë segment. Kompania në fjalë, po shkatërron mjedisin duke gërryer shpatin e malit. Shqetësimi i banorëve për firmën ndërtuese “Gjoka Konstruksion” qëndron te nxjerrja e inerteve nga shpati i malit në afërsi të banesave të tyre. Këta të fundit thonë se nga gërmimet dhe shpërthimet me dinamit, po prishet peisazhi i kësaj zone që me ndërtimin e rrugës do jetë shpresa për turizëm dhe ekonominë rurale. Por, nga gërmimet jo vetëm prishet peisazhi, por ndotet edhe mjedisi duke lënë inertet e padëshiruara në rrugë. Banorët shprehen se kanë denoncuar rastin në Bashki, polici dhe inspektoriat por asnjë nuk i është përgjigjur thirrjeve të tyre. Vlen të theksohet se denoncimin në rrjetet sociale e ka bërë Abdulla Diku, ekspert mjedisi, i cili ka qenë zë kundër ndërtimit të HEC-eve në Valbonë.

Më konkretisht, ky i fundit ka shkruar se:

Si të shkatërrojmë jetën e një fshati! Ky është fshati Shkallë në Nj. Ad. Xibër, bashkia Klos. Është ndër fshatrat më të vjetër në vendin tonë. Aty afër, gjendet “shpella e shkruar”, me piktograma 3000-4000 vjeçare. Edhe kalaja ilire, apo ‘maja e qytezës’ gjenden mbi fshat. Përballë, gjendet kalaja e Petralbës, rezidenca verore e Skënderbeut. Rruga e Arbrit i kalon përmes fshatit. Tani që po bëhet rruga, turizmi shihet si mundësia e vetme ku banorët mund të mbijetojnë. Por nuk është e thënë....Kompanisë “Gjoka” që po ndërton rrugën, i ka pëlqyer guri e zhavorri në malin e fshatit dhe është hedhur në sulm. Kuptohet që nuk ka nevojë për leje. Kanë filluar shpërthimet me dinamit. Ato pak burime ujore do thahen e banesat kanë filluar të dridhen fort. Pasojat te asetet historike nuk llogariten fare, fundja kush ka më shumë rëndësi; historia mijëra vjeçare apo fitimi për kompaninë?! Gurorja e re nuk ka lidhje fare me rrugën e arbrit pasi është larg prej sajë. Banorët shqetësohen me të drejtë. Vraga e hapur në mal e një dite pune duket kilometra larg tani. Nga ana tjetër, kompania gurët dhe zhavorrin që gërryen përgjatë ndërtimit të rrugës e hedh pa asnjë problem nën rrugë dhe nuk i përdor ato. Leja e mjedisit apo leja për guroren nuk duken asgjëkundi (sepse nuk mund të jepet leje e tillë vetëm 100 metra larg shtëpive)! Dje banorët po telefonin policinë, por të gjithë numrat dilnin rastësisht “të padisponueshëm”. Inspektoriatet dhe Bashkia po ashtu! Ligji dhe maliqi është vetëm kompania.