JOQ Albania
App Store
SHKARKO
Home
JOQ Albania

“Shpërthen” Mazniku, 46 milionë për blerje gomash firmës së përjashtuar nga prokurimet
Shkruar nga: M Gjini | Publikuar më: 03/09/2020 23:31

  • Share
  • Share
  • Share
  • Share

Dhe ja ku vjen Mazniku. Përsëri ai. Përsëri me një bëmë tjetër. Nënkryetari i bashkisë Tiranë, siç ju kemi informuar edhe më parë, figuron gjithashtu edhe si administrator pranë shoqërisë ECO TIRANA SH.A. Kjo e fundit është një shoqëri e cila administrohet në masën 51% nga Bashkia Tiranë dhe 49% nga AGSM Holding ALBANIA. Vetëm pak kohë më parë ECO TIRANA u përfol si e implikuar e mundshme në pastrimin e parave të pista të mafies italiane, për shkak të një hetimi të zhvilluar nga prokuroria italiane.

Kjo e fundit akuzoi disa persona mes të cilëve Andrea Miglioranzi, njëri prej drejtuesëve të ortakëve të ECO TIRANA, dhe ish-kryebashkiaku i Veronës Flavio Tosi, si të përfshirë në bashkëpunim me disa pjesëtarë të organizatës mafioze Ndragheta. Flavio Tosi ishte kryebashkiaku i Veronës, i cili gjithashtu firmosi bashkë me Erion Veliaj marrëveshjen për krijimin e kompanisë ECO TIRANA. Me sa duket, administratorit të ECO TIRANA, Arbjan Mazniku-t, nuk i ndahet shpirti nga kompanitë të cilat kanë patur probleme me autoritetet.

Rezulton se kompania e drejtuar prej tij, pra ECO TIRANA, ka organizuar një tender me objekt “Blerje goma” i cili mban numrin e referencës REF-67436-07-30-2020. Për çudi, fituese është shpallur kompania R & R GROUP me administratore Lulzime Rami dhe pronare Elona Rami, me vlerë të ofruar 3.870.000 leke pa tvsh, ose rreth 46 milionë lekë të vjetra me TVSH.

Themi për çudi, pasi kompania në fjalë rezulton të jetë përjashtuar nga e drejta për të marrë pjesë në tendera për një periudhë kohore prej 18 muajsh, përkatëshit nga data 26.01.2017 deri në datën 26.07.2018. Pavarësisht se afati i përjashtimit ka përfunduar, nuk kuptohet se përse Arbjan Mazniku duhet të shpallë fituese një kompani e cila ka patur probleme me shtetin, madje të një niveli të tillë sa e kanë përjashtuar për 1,5 vjet.