JOQ Albania
App Store
SHKARKO
Home
JOQ Albania

Sondazhi/ Rritja e rasteve të koronavirusit, 77% e shqiptarëve kundër rikthimit të karantinës
Shkruar nga: V Gashi | Publikuar më: 16/06/2020 1:14

  • Share
  • Share
  • Share
  • Share

Ditët e fundit është vënë re një rritje drastike e rasteve të koronavirusit në Shqipëri.

Referuar të dhënave zyrtare, të cilat kanë "pikëpyetjet" e veta, vetëm gjatë 24 orëve të fundit u konfirmuan 67 raste të reja, shifër kjo e cila përbën numrin më të lartë të personave të infektuar brenda një dite, që prej shpërthimit të epidemisë në vendin tonë.

Në lidhje me rritjen e rasteve të reja, kryeministri i vendit, Edi Rama, paralajmëroi pak ditë më parë se nëse situata do të vijojë me këto ritme, ose do të ketë shtim të rasteve, ashtu siç po ndodh ditët e fundit, i gjithë vendi do të futet sërish në karantinë.

Mirëpo, izolimi i vendit shkaktoi një "tërmet" të vërtetë ekonomik, që solli falimentimin e qindra bizneseve në të gjithë vendin, po ashtu karantina nxorri në pah edhe varfërinë e tejskajshme të mijëra familjeve shqiptare, të cilat nuk siguronin dot as bukën e gojës.

Në lidhje me këtë situatë delikate sa i përket pandemisë në vendin tonë, JOQ Albania zhvilloi një sondazh për të krijuar një panoramë më të qartë se si do të reagonin shqiptarët në rast se vendi do të kthehej sërish në karantinë.

Pyetja e sondazhit ku morën pjesë më shumë se 47 mijë qytetarë shqiptarë ishte:

A jeni të gatshëm të ktheheni sërish në karantinë nëse rritet numri i të infektuarve me Covid-19?

Në rezultatin përfundimtar të sondazhit, 77% e qytetarëve shqiptarë janë shprehur kundër kthimit në karantinë, ndërsa 23% e tyre mendojnë se janë të gatshëm për t'u ri-izoluar në rast të përkeqësimin të situatës së rasteve të Covid-19 në vend.

Kjo dëshmon qartë se shumica dërrmuese e qytetarëve shqiptarë nuk do të dëshironin të ktheheshin dhe njëherë në karantinë, ku do privoheshin nga shumë të drejta themelore.