Është fakt që pjesa më e madhe e shqiptarëve janë të zhgënjyer nga jeta e tyre në Shqipëri.
Një pjesë e tyre, kryesisht të rinj, kanë zgjedhur të largohen jashtë vendit për një jetë më të mirë, për shkak të mundësive të limituara për ndërtimin e një të ardhme të konsoliduar që u ofrohen pas studimeve, ndërsa të tjerëve që jetojnë këtu thuajse "u ka ardhur shpirti në majë të hundës" me jetesën e këtushme.
Po ashtu, padrejtësitë sociale, pabarazia, korrupsioni në nivele të frikshme, abuzimi me paratë e grumbulluara na taksat e qytetarëve, "tallja" e politikanëve me hallet e shqiptarëve, janë ndër arsyet kryesore që kanë bërë që shumica e shqiptarëve të besojnë e të thonë bashkarisht se "ky vend nuk bëhet më".
Sot do të ndalemi tek politika shqiptare, e cila është arsyeja kryesore se pse vendi ynë ndodhet në këtë gjendje të mjerueshme.
Politikanët u premtuan shqiptarëve "parajsën", por kushdo që mori pushtetin, i dërgoi zvarrë në "ferr", duke i varfëruar gjithnjë e më tepër dhe duke i vrarë gjënë më të shtrenjtë, "shpresën për të ardhmen".
Përballë këtij "teatri të madh" që politika luan çdo ditë me jetën e shqiptarëve, JOQ Albania zhvilloi një sondazh ku pyetja ishte për besimin që qytetarët kanë tek politika jonë.
Dhe rezultati ishte befasues dhe një shuplakë popullore ndaj të gjithë politikanëve shqiptarë!
Nga mbi 21 mijë qytetarë që u bënë pjesë e sondazhit, 94% e tyre pohuan se nuk kanë besim tek politika shqiptare. Vetëm 6% e të anketuarve kanë besim tek politika shqiptare, një shifër totalisht e papërfillshme, e cila dëshmon dhe njëherë që shqiptarët ndihen të "tradhtuar" e "të pashpresë" se politika do bëjë diçka të mirë për ta në të ardhmen.
Andaj, mund të themi me plot gojën se populli shqiptar është lodhur nga premtimet-mashtrime të politikanëve, të cilët gjëja më e mirë që mund të bëjnë është "aktrimi me hallet e shqiptarëve" dhe sigurisht "vjedhja haptazi e parave të taksapaguesve shqiptarë".
