Është rritur bilanci i viktimave nga koronavirusi këtë pasdite.
Raportohet se dy pacientë, të konfiermuar me Covid-19, kanë ndërruar jetë në Spitalin Infektiv.
Një prej tyre është 77-vjeçari I.B., nga Kavaja, i cili po trajtohej prej dy javësh në spitalin Infektiv.
Ai ndërroi jetë në mënyrë të papritur nga një infarkt miokardi. I ndjeri vuante edhe nga disa sëmundje të tjera, si diabet mellitus, insuficiencë renale kronike dhe insuficiencë kardiake.
Viktima tjetër e koronavirusit në vend është 69-vjeçari R.P., nga Hasi, i cili po trajtohej prej 8 ditësh në spitalin Infektiv.
Gjendja e tij ishte rënduar gjatë tre ditëve të fundit, ndërsa ndodhej në respiracion të drejtuar. I ndjeri ka qenë në gjendje të rëndë shëndetësore gjatë gjithë kohës dhe pavarëssiht përpjekjeve të mjekëve, nuk mundi dot të mbijetojë.
Lajmi është dhënë nga Ministria e Shëndetësisë dhe Mbrojtjes Sociale, e cila u ka shprehur ngushëllimet familjeve të të ndjerëve dhe apelon qytetarët t’i respektojnë me shumë rigorozitet masat e distancimit social dhe izolimit, pasi janë përcaktuese për frenimin e përhapjes së COVID-19.
