Sezoni duhet të përfundojë patjetër dhe UEFA e ka të qartë këtë gjë. Insitucioni më i lartë i futbollit europian, planifikon që të luhet futboll deri në fund të gushtit dhe më pas, sezoni i ri të nisë në tetor.
Më pas kjo kohë e humbur pretendohet të kompensohet, duke lejuar më pak ndeshje të kombëtareve që marrin pjesë në kampionatin Europian, me qëllim lënien e hapësirës për klubet, që do duhet të gjejnë kohë për të mbyllur sezonin.
Gjithsesi, për të vendosur zyrtarisht, të mërkurën më 1 prill, UEFA dhe 55 federatat anëtare do të zhvillojnë një video-konferencë, ku do të diskutohen detajet e fundit mbi ecurinë e futbollit prej Coronavirusit këtë sezon.
I sigurt është fakti se UEFA nuk heq dorë nga ideja për ta mbyllur këtë sezon në fushë, me qëllim minimizimin sa më të madh të humbjeve financiare.
