“Dorëzohet” edhe Donald Trump, amerikanët izolohen deri më 30 prill

Donald Trump njoftoi se do të zgjasë udhëzimet për distancimin social në mbarë vendin edhe për 30 ditë të tjera, si masë e rëndësishme kundër përhapjes së koronavirusit.

Udhëzimet 15-ditore që Trump njoftoi dy javë më parë mbarojnë sot dhe Presidenti vendosi shtyrjen e afatit. Vendimi u mor pasi SHBA pritet që të ketë "pikun" pas dy javësh.

Trump u shpreh:

Numri më i lartë i vdekjeve pritet të jetë pas dy javësh. Sa më mirë të bësh, aq më shpejt do të përfundojë i gjithë ky makth.

Njoftimi shënoi një kthesë të papritur nga një javë më parë kur Trump tha se ishte i bindur se kufizimet në distancë po shkaktonin dëme të pariparueshme në ekonomi.

Kujtojmë se Amerika është në vendin e parë përsa i përket numrit të të prekurëve nga Covid-19. Numri i viktimave i ka kaluar 2400 ndërsa numërohen mbi 142 mijë të infektuar.

Trump përsëriti qëllimin e tij për ta kthyer jetën në normalitet dhe për të rregulluar ekonominë amerikane.

Ai shtoi:

Unë dua që jeta jonë të kthehet përsëri në normalitet.

Burimi: CNN | Përktheu dhe Përshtati: JOQ ALBANIA