Pasagjerët e një autobusi nga Kosova janë detyruar të presin në Lindau të Bavarisë një autobus tjetër për të vazhduar rrugën. Kjo ka ndodhur pasi që autobusi i tyre është konfiskuar nga doganierët gjermanë. Sipas një zëdhënësi të Zyrës Qendrore të Doganave në Ulm, kompania që kishte në qarkullim autobusin në fjalë, i kishte borxh doganës plot 29.000 euro. Për këtë arsye doganierët e Landit Baden-Württemberg e kanë ndaluar autobusin afër kufirit me Austrinë.
Pasagjerët (numri i tyre nuk dihet) ishin detyruar të prisnin disa orë derisa të vinte autobusi i tyre i ri për t’i marrë. Kompania kosovare ishte një “e njohur e vjetër” për doganierët, përcjell albinfo.ch. Në vitet e kaluara, sipas zëdhënësit të përmendur, dogana i ka konfiskuar edhe dy autobusë të tjerë, për t`i shlyer borxhet e krijuara.
Normalisht, kompanive mund t`u kthehen autobusët vetëm pasi të kenë paguar borxhin te Zyra Gjermane e Financave. Ndërsa nëse kjo nuk ndodh, brenda 14 ditëve, autobusi do të shitet në ankand.
