Dorëzohet në polici Ervin Mata, zbardhet dëshmia e të shumëkërkuarit të vrasjes në ish-Bllok

Ditën e sotme është dorëzuar në polici Ervin Mata, një nga emrat më të kërkuar për ngjarjen e ndodhur gjatë vitit të kaluar në një nga lokalet më të njohura në zonën e ish- Bllokut.

Mata akuzohet për “vrasje në rrethana të cilësuara të mbetur në tentativë, e kryer në bashkëpunim” si dhe “mbajtje pa leje e armëve dhe municioneve luftarake”.

Për ngjarjen e rëndë të ndodhur më 4 tetor 2018 në zonën e ish-bllokut, janë shpallur në kërkim edhe Merviol Bilo dhe Fabio Alushi. Nga ngjarja e cila tronditi kryeqytenin përpara disa muajsh, mbeti i vdekur Fabian Gaxha dhe u plagos Ervis Martini.

Bëhet me dije se Mata ka deklaruar në polici se ai nuk ka qëlluar me armë ndaj as një personi. Mata ka deklaruar gjithashtu se iku nga vendi i ngjarjes pasi ishte frikësuar.

Eljo Hato u lirua nga burgu në saj të një garancie pasurore prej rreth 1 milionë lekësh, për t’u hetuar në gjendje të lirë. Ai mbeti i paralizuar nga përplasja me armë mes dy grupeve, brenda ambienteve të lokalit.

Eljo Hato akuzohet për vrasje të mbetur në tentativë, pasi të dyja palët kanë qëlluar me armë

Deklarata e Policisë:

Specialistët për Hetimin e Krimeve të Rënda ndaj Jetës në Drejtorinë Vendore të Policisë Tiranë ekzekutuan urdhërin e ndalimit për shtetasin: E. M., 31 vjeç, banues në Tiranë. Shtetasi E. M., është person i dyshuar për kryerjen e veprave penale të “Vrasjes në rrethana të cilësuara, e mbetur në tentativë, e kryer në bashkëpunim” dhe “Mbajtje pa leje të armëve dhe municioneve luftarake”, të parashikuara nga nenet 79 dh, 22, 25 dhe 278 të Kodit Penal. Materialet i kaluan për veprime të mëtejshme Prokurorisë së Rrethit Gjyqësor Tiranë.