Ka ndërruar jetë sot në moshën 89-vjeçare aktori i mirënjohur shqiptar Luan Qerimi.
Luan Qerimi kishte disa vite që ishte shkëputur nga kinematografia, e megjithatë rolet e tij të luajtura gjatë jetës e bëjnë të paharrueshëm.
Aktori, tashmë i ndjerë, ka luajtur mbi 70 role gjatë karrierës së tij si aktor. Luan Qerimi lindi në Lushnjë, 15 tetor 1929 dhe i hyri botës së aktrimit, fillimisht me lëvizjen amatore, për t’u aktivizuar në Teatrin e Ushtrisë, ku talenti i tij do të spikaste. Ishte 25 vjeç, kur në vitin 1954 do të hynte në Teatrin Popullor duke realizuar ëndrrën e çdo të riu që dëshironte të bëhej aktor.
Ndër rolet e tij spikatin ato në veprat skenike: “Toka jonë”, ”Orët e Kremlinit”, “Otello”, “Hamleti”, “Dragoi i Dragobisë”, “Përkolgjinajt”, “Cuca e maleve”, “Arturo Ui”, “Epoka para gjyqit”, etj. Në kinematografi ka luajtur në filmat “Qëndresa”, “Vdekja e kalit”, “Shpella e piratëve”, “Telefoni i një mëngjesi”, “Eja”, “Koha nuk pret”, “Gracka”, “Nëntori I Dytë”, “Shembja e idhujve”, “Toka jonë”, “Debatik”, etj.
Po ashtu ka interpretuar mbi 200 role në “Teatri në mikrofon” dhe ka kontribuar edhe në emisionet “Heroizmi i popullit tonë në shekuj”, si dhe “Fjala artistike në mikrofon”.
