Pas Monës dhe Lulit, Donald Lu i shtrëngon dorën kryeprokurores Arta Marku

Ambasadori i SHBA, Donald Lu është pritur nga kryeprokuroria Arta Marku pak minuta më parë në Prokurorinë e Përgjithshme në ditën e saj të tretë në krye të detyrës.

Mësohet se ky është takimi i parë i Lu-së pas zgjedhjes së saj Kryeprokurore ndërsa ka zgjatur vetëm pak minuta.

Ditën e djeshme ambasadori i SHBA-së u prit në takim nga krerët e opozitës Lulzim Basha dhe Monika Kryemadhi. Fill pas kësaj, ditën e sotme Donald Lu takon edhe kryeprokuroren Arta Marku.

Nuk dihet tema e takimit mes Lu dhe zonjës Marku, por me sa duket ambasadori amerikan do të tregojë mbështetjen për kryeprokuroren e re.

Ambasadori Lu është shprehur haptasi pro një Kryeprokurori të Përkohshëm me gjithë kundërshtimet e opozitës. Si ai ashtu edhe ambasadorja e BE kërkuan që parlamenti të vijonte punën për të zgjedhur një Prokuror të Përgjithshëm të Përkohshëm pas mbarimit të mandatit të Adriatik Llallës.

Ditën që u zgjodh mes protestave të opozitës jashtë dhe brenda parlamentit, Kryeprokurorja Arta Marku, ambasadori Lu deklaroi se komisionet e Vetingut do të kenë së shpejti rezultatet e tyre të para.

Lu u shpreh se:

Prokurori i Përgjithshëm që refuzonte të ndiqte penalisht politikanë është i ikur. Së shpejti do të shohim krijimin e SPAK-ut dhe BKH-së, të cilat do hetojnë dhe ndjekin penalisht zyrtarë të korruptuar të nivelit të lartë. Qytetarët shqiptarë presin me padurim për drejtësi. Dhe politikanët kanë frikë".

Takimi mes Lu dhe Markut zgjati 20 minuta, ndërsa më pas Kryeprokurorja e Përkohshme do të prezantohet te vartësit e saj në Prokurori. Ajo ka thirrur në takim një ditë më parë të gjithë prokurorët e Prokurorisë së Përgjithshme.