Dy persona ende të paidentifikuar kanë vjedhur një supermarket të linjës “Big Market” në qytetin e Sarandës, në pronësi të një 54-vjeçareje me iniciale K.A.
Autorët e grabitjes kanë thyer me forcë xhamin e supermarketit dhe kanë rrëmbyer kasafortën me rreth 10 milionë lekë të vjetra brenda.
Ata janë larguar me një automjet tip “Ford Eskort” me targa TR 8658 R, i cili është gjendur i braktisur në fshatin Çukë, Sarandë.
Targa është shpallur në kërkim nga DVPT (Drejtoria Vendore e Policisë Tiranë) dhe po punohet për kapjen e autorëve.
Njoftimi i Policisë:
Më datë 17.07.2017 rreth orës 04:00 në Ksamil është vjedhur supermarketi “Big Market”, në pronësi të shtetases K.A., 54 Vjeçe, banuese në Sarandë.
Autorët kanë arritur të hyjnë brenda supermarketit me forcë duke thyer xhamin e portës dhe kanë marrë kasafortën me rreth 1 milion lekë të reja.
Dyshohet se vjedhja është bërë në bashkëpunim nga dy persona, ende të paidentifikuar, me automjetin tip “Ford Eskort” me targa TR 8658 R, i cili është gjetur i braktisur në fshatin Çukë, Sarandë.
Nga verifikimet e bëra rezulton se kjo targë është e shpallur në kërkim nga DVP Tiranë. Policia vazhdon hetimet për kapjen dhe ndalimin e autorëve të ngjarjes. Materialet u referuan në Prokurori për veprën penale “Vjedhja” , parashikuar nga neni 134/2 i Kodit Penal.
