Diaspora vazhdon të jetë një nga shtyllat kryesore të ekonomisë së Kosovës, duke dërguar miliarda euro për familjarët e tyre. Megjithatë, pjesa dërrmuese e këtyre parave po shpenzohet për konsum të përditshëm, banesa dhe ndërtime, ndërsa shumë pak po investohet në zhvillimin ekonomik të vendit.
Sipas të dhënave të Aleancës Kosovare të Bizneseve (AKB), nga viti 2021 deri në qershor të vitit 2026, diaspora ka dërguar rreth 7.16 miliardë euro në Kosovë.
Nga kjo shumë, sipas vlerësimeve të AKB-së, rreth 80% janë orientuar drejt konsumit, patundshmërive dhe ndërtimit, ndërsa vetëm 2% drejt bizneseve, industrisë dhe prodhimit vendor. Kjo nënkupton se, në mënyrë të përafërt, vetëm 143 milionë euro janë orientuar në sektorë që mund të kontribuojnë drejtpërdrejt në zhvillimin e prodhimit.
Kryetari i AKB-së, Agim Shahini, ka ngritur shqetësimin se Kosova nuk po arrin ta shfrytëzojë potencialin e jashtëzakonshëm financiar të mërgatës për hapjen e fabrikave, krijimin e vendeve të punës dhe rritjen e eksporteve.
AKB i ka bërë thirrje Qeverisë së Kosovës të hartojë një strategji të veçantë për të nxitur investimet e diasporës, duke ofruar lehtësira fiskale, siguri juridike dhe kushte më të favorshme për bizneset.
Diaspora po vazhdon ta mbajë gjallë ekonominë e Kosovës me miliarda euro, por mbetet pyetja: Pse institucionet nuk po krijojnë kushte që këto para të kthehen në fabrika, prodhim dhe vende të reja pune?