OSHEE lë pa drita fshatrat e Gjirokastrës: I ndërpresin në 8 të darkës, i rikthejnë në 11 të paradites

Shkruar nga: V Gashi | Publikuar më: 18.11.2026, 22:50

Banorët e rreth 10 fshatrave në zonën e Njësisë Administrative Cepo, në Gjirokastër, po përballen me ndërprerje të gjata të energjisë elektrike, të cilat sipas një denoncimi të mbërritur në redaksinë e JOQ Albania përsëriten prej 3-4 ditësh.

Një banor tregon se energjia elektrike ndërpritet çdo mbrëmje rreth orës 20:00 dhe rikthehet vetëm rreth orës 11:00 të paradites së ditës pasardhëse. Kjo do të thotë se banorët qëndrojnë rreth 15 orë pa energji elektrike.

Sipas denoncuesit, problemi prek zonën nga Ura e Kardhiqit deri në Zhulat, ku përfshihen rreth 10 fshatra.

Banorët shprehen të shqetësuar për këtë situatë, e cila u vështirëson jetën e përditshme, ndërsa theksojnë se nuk kanë marrë asnjë njoftim apo sqarim paraprak për ndërprerjet e përsëritura.

Ata kërkojnë ndërhyrjen e OSHEE-së për të sqaruar arsyet e këtij problemi dhe për të rikthyer furnizimin normal me energji elektrike.

JOQ Albania kërkon nga OSHEE dhe institucionet përgjegjëse të reagojnë urgjentisht, të bëjnë transparencë mbi arsyet e këtyre ndërprerjeve të zgjatura dhe të marrin masa konkrete për zgjidhjen e problemit. Banorët nuk mund të lihen çdo natë në errësirë për 15 orë, pa asnjë shpjegim se kur dhe përse do të rikthehet energjia elektrike!

FACT CHECK: Synimi i JOQ Albania është t’i paraqesë lajmet në mënyrë të saktë dhe të drejtë. Nëse ju shikoni diçka që nuk shkon, jeni të lutur të na e raportoni këtu.
JOQ Sondazh
KLIKO PËR TË VOTUAR
Më të Lexuarat
Shkarkoni aplikacionin JOQ ALBANIA në platformat
Më të fundit