Dikur tre musketjerët kishin një moto të thjeshtë: “Një për të gjithë dhe të gjithë për një”. Tre musketjerët e sotëm duket se kanë zgjedhur një version tjetër: “Një për pushtetin, të gjithë kundër protestuesve!”
Edi Rama, Emmanuel Macron dhe Giorgia Meloni janë mbledhur në Dublin, në samitin e Komunitetit Politik Europian, për të diskutuar demokracinë, sigurinë dhe të ardhmen e Europës. Tre liderë nga tri vende të ndryshme, por me një shqetësim të përbashkët: qytetarët që nuk pajtohen me qeveritë e tyre dhe që, në vend që të heshtin, dalin në rrugë për të protestuar.
Rama vjen nga Shqipëria, ku qytetarët prej kohësh kërkojnë largimin e tij, ndërsa qeveria vazhdon të flasë për dialog, pa u dhënë përgjigje kërkesave të tyre. Macron përfaqëson Francën, ku protestat dhe grevat janë kthyer në një mënyrë të zakonshme për t'i kundërshtuar vendimet e qeverisë. Ndërsa Meloni vjen nga Italia, ku edhe qeveria e saj është përballur me protesta dhe pakënaqësi qytetare.
Por Rama pati një pritje të veçantë në Dublin. Disa protestues shqiptarë e pritën me vezë, të cilat u hodhën në drejtim të tij. Kryeministri e cilësoi këtë si pjesë të demokracisë. Sa bukur! Kur qytetarët të hedhin vezë në Irlandë, kemi të bëjmë me demokraci. Kur dalin në rrugët e Tiranës për të kërkuar llogari, me sa duket, demokracia bëhet paksa e bezdisshme.
Nuk e dimë nëse tre liderët kanë diskutuar mes tyre për protestat në vendet përkatëse, por tema duket e përshtatshme për një bisedë mes tyre: si t'i bindësh qytetarët se zëri i tyre dëgjohet, ndërkohë që vendimet vazhdojnë të merren sikur askush të mos ketë folur.
Në fund, nuk mungojnë buzëqeshjet, fotografitë dhe fjalimet për vlerat europiane. Pastaj secili kthehet në vendin e vet, ku e pret i njëjti “problem”: qytetarët që nuk kënaqen vetëm me premtime, por kërkojnë edhe llogari.
Në fund të fundit, populli është sovrani. Ka të drejtë të zgjedhë qeverinë, por duket se duhet të ketë kujdes të mos e shqetësojë shumë pasi ajo të vijë në pushtet.
Një për të gjithë, të gjithë për një… dhe populli, ju lutem, mos ua prishni rehatinë!
