Rritja e pakontrolluar e çmimeve në sektorin e shërbimeve dhe gastronomisë në kryeqytet vijon të mbetet një shqetësim i madh për qytetarët.
Së fundmi, një qytetar i është drejtuar redaksisë tonë për të denoncuar një rast të ngjashëm pasi është faturuar 650 Lekë për vetëm një kafe dhe një shishe ujë.
Nga të dhënat e bëra publike, fatura ka vetëm dy artikuj: Kafja: 150 Lekë (një çmim relativisht standard për zonat e ndryshme të Tiranës) dhe uji 500 lekë ose 5 minë të vjetra.
Ai thotë se kamerierit i ka kërkuar një shishe uji të vogël, pa u vënë në dijeni paraprakisht për çmimin apo për ndonjë markë speciale, atij i është shërbyer uji i markës franceze "Abatilles".
Fatura përfundimtare prej 650 Lekësh ka lënë të habitur qytetarin i cili nuk e prisntr që një shishe e vetme uji të kushtonte sa trefishi ose katërfishi i kafesë.
Ky rast ka sjellë sërish në vëmendje debatin mbi mungesën e transparencës së çmimeve në menu dhe mungesën e etikës në disa prej lokaleve të kryeqytetit, ku klientët përballen me fatura surprizë pasi kanë konsumuar produktet.
Raste të tilla ngrenë domosdoshmërinë e një kontrolli më të rreptë nga ana e strukturave të Mbrojtjes së Konsumatorit dhe Autoritetit të Konkurrencës, për të parandaluar abuzimet me çmimet e produkteve bazë në baret dhe restorantet e vendit.
