Qytetarët e Kosovës do të përballen sërish me ndërprerje të energjisë elektrike.
KEDS ka njoftuar se të mërkurën, më 11 nëntor 2026, dhjetëra fshatra dhe lagje në disa rajone të vendit do të mbesin pa rrymë për disa orë, ndërsa në zonat më të prekura ndërprerjet do të zgjasin deri në 9 orë e gjysmë.
Situata më e rënduar parashikohet në Ferizaj, ku nga ora 08:30 deri në 18:00 do të ketë ndërprerje në disa rrugë të qytetit dhe në fshatrat Balaj, Jezerc, Manastirc dhe Neredime. Në rajonin e Prishtinës, ndërprerjet do të prekin Prugovcin, Besinë, Barilevën, Shkabajn, Mazgitin dhe disa zona të Obiliqit, me orare të ndryshme nga 09:00 deri në 17:00.
Pa energji elektrike do të mbesin edhe disa pjesë të Podujevës, Pejës, Istogut dhe Klinës. Ndërprerje janë paralajmëruar gjithashtu në Dragash, Suharekë, Kaçanik dhe Rahovec, ku një numër i konsiderueshëm fshatrash do të preken nga punimet në rrjet.
Sipas KEDS-it, ndërprerjet lidhen me eliminimin e defekteve të identifikuara gjatë inspektimeve me dron, mirëmbajtjen e rrjetit elektrik, pastrimin e traseve dhe realizimin e projekteve investive.
Qytetarëve u rekomandohet të kontrollojnë oraret e ndërprerjeve në zonat ku jetojnë dhe të planifikojnë aktivitetet e tyre, veçanërisht ata që varen nga furnizimi i pandërprerë me energji elektrike.