Rrugët e Kosovës vazhdojnë të marrin jetë njerëzish. Vetëm gjatë tetë muajve të parë të vitit 2026, nga janari deri në gusht, 79 persona kanë humbur jetën si pasojë e aksidenteve në trafik.
Sipas të dhënave të bëra publike nga zëdhënësi i Policisë së Kosovës, Daut Hoxha, gjatë kësaj periudhe janë regjistruar 74 aksidente me pasoja fatale, prej të cilave 22 kanë qenë vetaksidente. Nga numri i përgjithshëm i viktimave, 44 kanë qenë shoferë.
Përballë këtyre shifrave shqetësuese, Policia e Kosovës u ka bërë thirrje të gjithë pjesëmarrësve në trafik që të tregojnë kujdes të shtuar, veçanërisht drejtuesve të automjeteve, duke respektuar kufizimet e shpejtësisë dhe rregullat e qarkullimit.
Hoxha ka theksuar se policia ka intensifikuar praninë në terren, mbikëqyrjen dhe kontrollet rrugore me qëllim parandalimin e aksidenteve dhe rritjen e sigurisë.
79 jetë të humbura për tetë muaj janë një bilanc tragjik që duhet të shërbejë si alarm për të gjithë. Sa jetë të tjera duhet të humbasin që siguria në rrugët e Kosovës të merret më seriozisht?