Dështim në menaxhimin e shkollave në Prishtinë, drejtori Arianit Elshani përballet me gjendje alarmante dhe bojkot të mësimit!

Shkruar nga: B Hasi | Publikuar më: 06.11.2026, 10:58

Gjendje alarmante në shkollat e Prishtinës! Nxënësit e dy shkollave të kryeqytetit, “Ismail Qemali” dhe “Mehmet Gjevori”, kanë mbetur pa mësim këtë të premte për shkak të kushteve të rënda higjieno-sanitare, duke ngritur pikëpyetje serioze mbi menaxhimin e situatës nga Drejtoria Komunale e Arsimit, e udhëhequr nga Arianit Elshani.

Papastërtia në ambientet shkollore dhe mungesa e mirëmbajtjes kanë detyruar Këshillat e Prindërve të reagojnë me bojkot të procesit mësimor, pasi vlerësojnë se shëndeti i fëmijëve të tyre është vënë në rrezik.

Situata ka nxjerrë në pah një problem serioz të menaxhimit institucional. Ndërsa punëtorët teknikë kanë qenë në grevë prej javësh, institucionet komunale nuk kanë arritur të garantojnë në kohë kushtet e nevojshme për zhvillimin normal të mësimit.

Në vend të bankave shkollore, nxënësit po përballen me pasojat e një krize të pazgjidhur të pastrimit, ndërsa prindërit janë detyruar të ndërmarrin masa për mbrojtjen e shëndetit të fëmijëve.

Drejtori i Arsimit, Arianit Elshani, ka deklaruar se Komuna ka arritur marrëveshje për pagën minimale të punëtorëve teknikë dhe se ndërmarrjet publike janë angazhuar për pastrimin e shkollave.

Megjithatë, Elshani ka ngritur edhe dyshime se papastërtia në këto dy shkolla mund të jetë krijuar qëllimisht nga disa punëtorë teknikë, pretendime që nuk janë konfirmuar në mënyrë të pavarur.

Pavarësisht shpjegimeve të drejtorit, fakti që nxënësit kanë mbetur pa mësim për shkak të kushteve higjienike shtron pyetje serioze për përgjegjësinë e drejtuesve të arsimit në kryeqytet.

Si është e mundur që shkollat e Prishtinës të arrijnë në një gjendje të tillë, ku prindërit detyrohen të bojkotojnë mësimin për të mbrojtur shëndetin e fëmijëve? Kush mban përgjegjësi për mungesën e një zgjidhjeje në kohë?

Ndërkohë, ende nuk dihet nëse nxënësit do t'u rikthehen bankave shkollore të hënën, ndërsa prindërit kërkojnë kushte të sigurta dhe dinjitoze për fëmijët e tyre.

FACT CHECK: Synimi i JOQ Albania është t’i paraqesë lajmet në mënyrë të saktë dhe të drejtë. Nëse ju shikoni diçka që nuk shkon, jeni të lutur të na e raportoni këtu.
JOQ Sondazh
KLIKO PËR TË VOTUAR
Më të Lexuarat
Shkarkoni aplikacionin JOQ ALBANIA në platformat
Më të fundit