Një denoncim i mbërritur në redaksinë e JOQ Albania nga një grup punonjësish të Institucionit të Ekzekutimit të Vendimeve Penale (IEVP) Fier ngre pikëpyetje serioze mbi mënyrën se si po trajtohen punonjësit e këtij institucioni pas vizitës së ministrit të Drejtësisë, Toni Gogu, te Erion Veliaj.
Punonjësit pretendojnë se po përballen me presione, pezullime dhe kërcënime për largim nga puna, pasi kanë folur për rrethanat e vizitës së ministrit në burgun ku ndodhet kryebashkiaku i Tiranës.
Sipas njërit prej denoncuesve, ministri nuk ka mbërritur në institucion në mënyrën që është përshkruar në disa raportime, por është marrë nga drejtori i burgut në fshatin Sheqishtë dhe është dërguar në ambientet e institucionit me automjetin e këtij të fundit. Denoncuesi pretendon se ministri ishte i veshur me kostum sportiv dhe mbante një kapele.
Punonjësi këmbëngul se e ka parë vetë automjetin e drejtorit duke hyrë në institucion nga rruga që lidh burgun me fshatin Sheqishtë dhe kërkon verifikimin e pamjeve të kamerave të sigurisë.
Por pretendimet nuk ndalen këtu. Sipas tij, pasi kjo ngjarje është bërë publike, drejtuesit kanë nisur të ushtrojnë presion ndaj punonjësve, ndërsa disa prej tyre janë përballur me masa pezullimi dhe lëvizje nga vendet e punës.
Denoncuesi thotë se edhe gjatë ditës së sotme janë paraqitur dy oficerë të Policisë Gjyqësore (OPGJ), të cilët kanë kryer veprime të dokumentuara ligjërisht, ndërsa më pas një tjetër punonjës i Policisë së Burgjeve është pezulluar nga detyra.
Përveç kësaj, punonjësit ngrenë akuza të rënda edhe për gjendjen brenda institucionit. Ata pretendojnë se burgu është i mbingarkuar, se në ambientet e tij futen persona të paautorizuar dhe sende të ndaluara, si dhe se ka parregullsi në dokumentacionin e brendshëm, përfshirë edhe falsifikime të pretenduara në regjistra.
Sipas tyre, situata e punës është bërë gjithnjë e më e vështirë, ndërsa punonjësve u kërkohet të heshtin dhe të mos flasin për problematikat që pretendojnë se kanë konstatuar.
Kujtojmë se vizita e ministrit Toni Gogu te Erion Veliaj në burgun e Fierit u konfirmua publikisht nga vetë ministri më 2 nëntor. Gogu deklaroi se kishte shkuar për t'u njohur me kushtet e trajtimit të Veliajt dhe për të dëgjuar ankesat e tij, duke mohuar pretendimet se i kishte përcjellë mesazhe në emër të kryeministrit Edi Rama.
Ndërkohë, raportimet mediatike kanë bërë me dije se takimi është zhvilluar në zyrën e drejtorit të burgut dhe se ministri kishte marrë autorizimin përkatës nga SPAK.
Në këtë situatë, lindin disa pyetje që kërkojnë përgjigje nga Ministria e Drejtësisë dhe Drejtoria e Përgjithshme e Burgjeve: A janë pezulluar punonjës për shkak të informacioneve që kanë bërë publike lidhur me vizitën e ministrit? A është e vërtetë se drejtori e ka marrë personalisht ministrin nga fshati Sheqishtë? Çfarë po ndodh me pretendimet për parregullsi dhe futjen e sendeve të ndaluara në institucion?
Një institucion vuajtjeje dënimi nuk mund të funksionojë mbi frikën dhe heshtjen e punonjësve. Nëse pretendimet janë të pavërteta, institucionet duhet t'i përgënjeshtrojnë me fakte. Nëse janë të vërteta, atëherë kërkohet një hetim serioz, jo ndëshkimi i atyre që ngrenë shqetësime.
JOQ Albania është e gatshme të publikojë edhe qëndrimin e drejtorisë së IEVP Fier, Drejtorisë së Përgjithshme të Burgjeve dhe Ministrisë së Drejtësisë për këto akuza.
