Një ngjarje e rëndë është shënuar në lagjen “Beqir Dardha” të Elbasanit, ku një shpërthim i fuqishëm në një pallat ka shkaktuar humbjen e jetës së një të moshuare 83-vjeçare, ndërsa tetë persona të tjerë kanë mbetur të asfiksuar.
Shpërthimi ka shkaktuar gjithashtu dëme të konsiderueshme materiale dhe shembjen e mureve në katin e tretë dhe të katërt, si dhe dëmtimin e një pjese të shkallëve të përbashkëta. Situata krijoi panik dhe frikë te banorët, të cilët u gjendën papritur përballë një situate emergjente.
Pas marrjes së njoftimit, në vendngjarje mbërritën forcat zjarrfikëse, efektivët e policisë dhe ekipet e emergjencës.
Strukturat e ndërhyrjes u angazhuan për evakuimin e banorëve, dhënien e ndihmës për personat e prekur dhe vlerësimin e situatës për të shmangur rreziqe të tjera.
