Detaje të reja kanë dalë në dritë lidhur me tragjedinë që ndodhi të dielën, më 1 nëntor, në fshatin Demiraj të Gjilanit, ku një 27-vjeçar dhe foshnja e tij vetëm tre muajshe u gjetën të pajetë brenda banesës.
Policia e Kosovës ka konfirmuar se për këtë ngjarje është arrestuar babai 65-vjeçar i të riut, i cili dyshohet për përfshirje në rastin që tashmë po hetohet si “Vrasje e rëndë”.
Sipas informacioneve zyrtare, policia është njoftuar rreth orës 08:47 të mëngjesit të 1 nëntorit për dy persona pa shenja jete në një shtëpi në Demiraj. Në vendngjarje kanë mbërritur menjëherë njësitet policore, Prokurori i Shtetit dhe ekipet emergjente, të cilat kanë konstatuar vdekjen e 27-vjeçarit dhe foshnjës.
Nga hetimet paraprake dyshohet se ngjarja ka ndodhur brenda familjes. Me vendim të prokurorit, 65-vjeçari është ndaluar për 48 orë, ndërsa autoritetet po punojnë për zbardhjen e plotë të rrethanave.
Në disa media kosovare është raportuar se 27-vjeçari dyshohet të ketë vrarë fillimisht foshnjën, ndërsa babai i tij më pas të birin. Megjithatë, kjo pistë nuk është konfirmuar zyrtarisht nga Policia apo Prokuroria.
Trupat e pajetë janë dërguar në Institutin e Mjekësisë Ligjore në Prishtinë për obduksion, i cili pritet të ndihmojë në përcaktimin e shkaqeve të vdekjes.
Për tragjedinë ka reaguar edhe kryetari i Gjilanit, Alban Hyseni, i cili u ka shprehur ngushëllime familjarëve dhe ka kërkuar nga institucionet kompetente zbardhjen e plotë të rastit.
Ngjarja ka tronditur komunitetin, ndërsa motivi dhe rrethanat e sakta të vdekjes së dy viktimave mbeten ende nën hetim.
