Zhvillimet më të fundit politike brenda partisë në pushtet kanë marrë një rrjedhë të papritur e me tone të ashpra debati. Kryeministri Edi Rama ka prerë çdo hapësirë diskutimi lidhur me trajtimin dhe transferimin e kryetarit të Bashkisë së Tiranës, Erion Veliaj, duke e cilësuar të gjithë situatën si pjesë të një komploti dhe orvatjeje për rrëzimin e tij nga pushteti.
Sipas burimeve nga mbledhja e zhvilluar me kabinetin qeveritar dhe drejtuesit politikë të qarqeve, kreu i qeverisë ka mbajtur një qëndrim të prerë ndaj zërave kritikë brenda radhëve të socialistëve. Këta të fundit kishin kërkuar shpjegime për ligjshmërinë dhe kushtet e transferimit të papritur të Veliajt nga paraburgimi i Durrësit në atë të Fierit.
Gjatë takimit, Rama e ka zhvendosur vëmendjen nga aspekti ligjor apo të drejtat e të paraburgosurit, duke e shpallur ish-bashkëpunëtorin e tij të ngushtë si figurën qendrore të një lëvizjeje puçiste kundër ekzekutivit. Me këtë qëndrim, kryeministri u ka bërë të qartë të pranishmëve se çështja konsiderohet e mbyllur dhe se çdo bashkëpunim apo përkrahje ndaj kësaj linje do të trajtohet si minim i stabilitetit të pushtetit.
Transferimi i kryebashkiakut në burgun e Fierit dhe reagimi i ashpër i kryeministrit shënojnë një nga krisjet më të mëdha politike brenda partisë në pushtet gjatë viteve të fundit.
