Autopsia e trupit të 31-vjeçarit Denaldo Maxhallaku, i cili u vra me armë zjarri, do të kryhet të hënën e ardhshme. Ekzaminimi mjeko-ligjor pritet të jetë një nga momentet kyçe të hetimit, pasi ka disa detaje të rëndësishme që ende presin të sqarohen.
Një nga pyetjet kryesore që kërkon përgjigje është nëse 31-vjeçari kishte ndërruar jetë nga tre plumbat e marrë përpara se trupi i tij të hidhej në pus, apo nëse ishte ende gjallë në momentin kur u hodh aty.
Ky detaj konsiderohet me rëndësi të veçantë edhe në aspektin ligjor, pasi nëse viktima ka qenë ende gjallë kur u hodh në pus, kjo rrethanë mund të përbëjë një rrethanë rënduese për veprën penale, për shkak të mizorisë.
Autopsia do të kryhet nga mjekja ligjore Donatella Fedeli, e cila do të analizojë nëse plumbat kanë prekur organe jetësore dhe nëse dëmtimet kanë shkaktuar vdekjen e menjëhershme të viktimës.
Një tjetër element i rëndësishëm i hetimit është dinamika e të shtënave. Për këtë arsye, autoritetet kanë angazhuar edhe një ekspert balistik, i cili do të analizojë vrimat e hyrjes dhe daljes së plumbave, si dhe këndin e goditjes.
Këto të dhëna, së bashku me distancën nga e cila është qëlluar, mund të ndihmojnë në përcaktimin e pozicionit të viktimës në momentin e ekzekutimit dhe nëse të shtënat janë kryer nga një distancë shumë e afërt.
Rezultatet e ekspertizave pritet të ndihmojnë hetuesit të kuptojnë më qartë rrethanat e vrasjes, si dhe të përcaktojnë nëse ajo ishte e paramenduar apo ka ndodhur në mënyrë të menjëhershme.
Pas përfundimit të autopsisë pritet të caktohet edhe data e ceremonisë mortore.
Ndërkohë, Daniele Sartini, i cili ka pranuar autorësinë e vrasjes, vijon të qëndrojë në paraburgim, në pritje të vleftësimit të arrestit nga gjykata. Sipas raportimeve, kjo procedurë pritet të zhvillohet gjatë ditës së sotme ose, më së voni, nesër.
