Paditet ChatGPT: I uli dozën e ilaçeve për epilepsinë, ndërron jetë 31-vjeçarja

Një padi e rëndë për vdekje të padrejtë është dorëzuar në Gjykatën e Lartë të Qarkut të San Franciskos kundër kompanisë OpenAI dhe ekzekutivit të saj, Sam Altman. Inteligjenca artificiale akuzohet se dha këshilla mjekësore fatale, duke e bindur një 31-vjeçare të ndërpriste medikamentet kundër epilepsisë, veprim që i mori jetën.

Padia është ngritur nga organizata "Social Media Victims Law Center" dhe studio ligjore "The Schenk Law Firm", në emër të prindërve të së ndjerës Bowen Wan, nga Seattle i SHBA-së.

Plani fatal i GPT-4o: Nga 400 mg në zero brenda 25 ditësh

Sipas dokumenteve gjyqësore, modeli më i fundit i inteligjencës artificiale, GPT-4o, i krijoi 31-vjeçares një skemë me shkrim për të reduktuar dozën e ilaçit të saj kundër krizave epileptike (Lamotriginë) nga 400 mg në 0 mg brenda më pak se një muaji, pa asnjë miratim nga mjeku specialist.

Përveç uljes së dozës, chatbot-i pretendohhet se zhvilloi një sjellje manipuluese ndaj pacientes:

• Udhëzime për të fshehur të vërtetën: ChatGPT e udhëzoi Wan-in që gjatë vizitës me mjekun e saj të mos e përmendte ekzistencën e planit për ndërprerjen e ilaçit.
• Refuzimi i analizave: AI e lavdëroi vendimin e pacientes për të refuzuar një analizë gjaku, e cila mund të kishte zbuluar menjëherë rënien e nivelit të medikamentit në trup.

Bowen Wan u gjet pa jetë në banesën e saj më 14 shkurt. Mjeku ligjor i Qarkut King përcaktoi si shkak zyrtar "vdekjen e papritur në rastin e epilepsisë" (SUDEP).

8 akuza të rënda dhe kërkesa për mbikëqyrje 5-vjeçare

Padia e dorëzuar më 27 tetor përmban tetë akuza kryesore, ku ndër më të fortat janë ushtrimi i palicencuar i mjekësisë dhe psikologjisë, dizajni i dëmtuar i produktit, neglizhenca dhe dështimi për të dhënë paralajmërime të sigurisë.

"Padia shtron pyetjen se ku përfundon inteligjenca artificiale gjenerative dhe ku fillon mjekësia, si dhe kush mban përgjegjësi kur një produkt e kalon atë kufi," – deklaroi Benjamin S. Schenk, avokat i familjes.

Prindërit e 31-vjeçares kërkojnë dëmshpërblim financiar dhe dëme ndëshkuese, si dhe masa drastike ligjore:

1. Ndalim absolut: ChatGPT të mos lejohet më të japë këshilla për dozimin apo ndërprerjen e medikamenteve.
2. Kufizim automatik: Përdoruesit që kërkojnë këshilla mjekësore të ridrejtohen menjëherë te mjekët e licencuar.
3. Kujdestari e pavarur: Caktimi i një mbikëqyrësi të jashtëm për OpenAI për një periudhë fillestare 5-vjeçare.