Albert Sylaj, i dyshuari për vrasjen e Arlinda Zekajt në Pejë, raportohet se është lokalizuar në Deçan, dy ditë pas krimit të rëndë që tronditi Kosovën.
Sylaj raportohet se ka komunikuar mbrëmjen e sotme, duke deklaruar se nuk pranon t'u dorëzohet hetuesve të Policisë, por vetëm pjesëtarëve të njësisë speciale FIT.
Mësohet se i dyshuari ka kërkuar gjithashtu të bisedojë për 10 minuta me familjarët e tij përpara se të vetëdorëzohet. Këtë kërkesë raportohet se e ka përcjellë gjatë një komunikimi përmes interfonit me vëllain e tij.
Ndërkohë, nëna, vëllai dhe fëmijët e tij raportohet se janë nisur për ta takuar, të shoqëruar nga pjesëtarët e njësisë FIT.
Deri më tani nuk ka asnjë konfirmim zyrtar nga Policia e Kosovës se Albert Sylaj është arrestuar apo është dorëzuar.
Kujtojmë se Arlinda Zekaj u vra më 25 tetor, ndërsa Albert Sylaj dyshohet për përfshirje në këtë krim.
