Vrasja tragjike e Arlinda Zekajt në Vitomiricë të Pejës ka tronditur Kosovën dhe ka ngritur pikëpyetje të rënda mbi përgjegjësinë e institucioneve. Por ndërsa reagimet dhe kërkesat për llogaridhënie po shtohen, ministrja e Drejtësisë, Donika Gërvalla, e cila mban edhe postin e Koordinatores Kombëtare për Mbrojtjen nga Dhuna ndaj Grave, ende nuk ka dalë me një reagim publik për këtë rast, sipas raportimeve të deritanishme.
Më 13 mars 2026, kryeministri Albin Kurti e emëroi Gërvallën në këtë detyrë, duke deklaruar se “ky emërim forcon përkushtimin institucional për parandalimin dhe adresimin e dhunës”, si një çështje të sigurisë njerëzore dhe të drejtave themelore.
Por më 25 tetor, Arlinda Zekaj u vra në shtëpinë e saj, ndërsa për krimin dyshohet kunati i saj. Vetëm tri ditë përpara tragjedisë, 49-vjeçarja i ishte drejtuar Prokurorisë Themelore në Pejë, duke kërkuar ndërhyrje urgjente dhe duke paralajmëruar për rrezikun ndaj jetës së saj.
Ironikisht, më 10 tetor, pas një tjetër vrasjeje të rëndë në Gjilan, vetë Gërvalla kishte deklaruar se institucionet nuk duhet të presin që gratë të vriten për të reaguar.
Sot, pas vrasjes së Arlindës, heshtja e saj publike ngre pyetje për përgjegjësinë dhe rolin e saj si koordinatore kombëtare për mbrojtjen e grave.
Ndërkohë, Kryeprokurori i Shtetit ka kërkuar verifikimin e veprimeve dhe mosveprimeve të mundshme institucionale në trajtimin e rasteve të raportuara nga viktima. Ende mbetet për t'u përcaktuar nëse ka pasur shkelje apo neglizhencë nga zyrtarët përgjegjës.
Nëse mbrojtja e grave është prioritet shtetëror, ku është zëri i ministres që është ngarkuar pikërisht me koordinimin e kësaj mbrojtjeje?
Arlinda kërkoi ndihmë sa ishte gjallë. Tani që ajo nuk jeton më, familja dhe opinioni publik meritojnë përgjigje, transparencë dhe llogaridhënie, jo vetëm deklarata për përkushtim institucional.
