Dogana e Kosovës ka zhvilluar një aksion mbrëmjen e së premtes në Prishtinë, ku ka zbuluar dhe ndaluar 113 telefona mobilë të dyshuar si të kontrabanduar.
Kontrollet janë kryer në një biznes për shitjen e telefonave dhe në një banesë pranë tij.
Mes telefonave të sekuestruar kishte marka të njohura si iPhone, Samsung, Xiaomi, Google Pixel, OnePlus dhe Huawei.
Sipas Doganës, personi përgjegjës nuk kishte dokumente që dëshmonin importimin e ligjshëm dhe pagesën e detyrimeve doganore.
I dyshuari është intervistuar dhe më pas, me urdhër të prokurorit, është liruar për procedurë të rregullt.
