Kryeqyteti gjerman po përgatitet të ndërmarrë një nga lëvizjet më radikale në historinë e tregut imobiliar europian. Për të frenuar krizën e paprecedentë të qirave, Berlini planifikon të kalojë në pronësi publike mbi 140 mijë apartamente private brenda dy viteve të ardhshme, në një qytet ku rreth 85% e popullsisë jeton me qira.
Nisma shënjestron vetëm kompanitë e mëdha private që zotërojnë mbi 10 mijë apartamente në Berlin, mes të cilave gjigantët Vonovia, Heimstaden, Adler Group dhe Covivio.
Koalicioni qeverisës i përbërë nga Die Linke, Socialdemokratët SPD dhe Të Gjelbrit, parashikon një tavan dëmshpërblimi prej 16 miliardë eurosh për rreth 140 mijë deri në 150 mijë apartamente në total.
Goditjen më të rëndë pritet ta marrë Vonovia, qiradhënësi më i madh në Europë. Sipas përllogaritjeve të Financial Times, nga 130 mijë apartamente që ajo zotëron në Berlin, rreth 120 mijë prej tyre rrezikojnë të shtetëzohen.
Plani mbështetet në Nenin 15 të Kushtetutës Gjermane, një klauzolë e papërdorur që nga viti 1949, e cila lejon kalimin e tokës në pronësi publike për të mirën e përbashkët. Ndërkohë, drejtuesit e Vonovia-s e kanë cilësuar planin si "antikushtetues" dhe kanë paralajmëruar beteja të ashpra ligjore.
Kriza e sotme i ka rrënjët pas rënies së Murit të Berlinit, kur qyteti shiti rreth 200 mijë apartamente publike te korporatat private me çmime shumë të ulëta për të shlyer borxhet. Me kalimin e viteve, investitorët spekulativë blenë portofolet e banesave dhe përgjatë dekadës 2008–2018 çmimet e qirave u dyfishuan.
Pas dështimit të mekanizmave të tjerë mbrojtës, lëvizja qytetare "Deutsche Wohnen & Co. enteignen" i hapi rrugën referendumit. Gjatë vitit 2026, nën presionin politik të partisë Die Linke dhe pas miratimit të ligjit kuadër për socializimin, koalicioni qeverisës formalizoi planin politik, me synim zbatimin përfundimtar në vitin 2028 për t'i lënë kohë përballjeve në gjykata.
