Një tjetër rast i rëndë raportohet gjatë protestës në Tiranë. Aranit Alushi, një i ri nga Mallakastra, dyshohet se është goditur me plumb gome në zonën e barkut, duke pësuar dëmtime që kanë kërkuar ndërhyrje kirurgjikale.
Sipas raportimeve nga vendngjarja, i riu është transportuar në Spitalin e Traumës, ku është futur në sallën e operacionit, pasi predha dyshohet se i ka mbetur ende në trup.
Raportohet se Araniti ndodhet i vetëm në spital, ndërsa ende nuk ka informacion të plotë mbi gjendjen e tij shëndetësore pas ndërhyrjes.
Plagosja e tij vjen në një mbrëmje të tensionuar në kryeqytet, ku gjatë përplasjeve në protestë Policia ka përdorur gaz lotsjellës dhe mjete të tjera për shpërndarjen e turmës, ndërsa janë raportuar edhe goditje me plumba gome ndaj protestuesve.
Rasti ngre sërish pikëpyetje serioze mbi përdorimin e forcës ndaj qytetarëve gjatë protestës. Pritet të mësohet më shumë mbi rrethanat në të cilat i riu u plagos dhe mbi gjendjen e tij pas ndërhyrjes kirurgjikale.
