Kanë kaluar gjashtë ditë nga vrasja tragjike e 29-vjeçarit Bajram Arifi në fshatin Pogragjë të Gjilanit, ndërsa babai i tij, Ramiz Arifi, i dyshuari kryesor për krimin, vazhdon të jetë në arrati.
Ngjarja e rëndë ndodhi më 11 tetor, rreth orës 19:30, kur 29-vjeçari dyshohet se u qëllua për vdekje me armë zjarri nga babai i tij. Pas krimit, i dyshuari raportohet se u largua nga vendngjarja me një automjet të tipit Suzuki.
Zëdhënësi i Policisë së Kosovës për rajonin e Gjilanit, Ismet Hashani, ka konfirmuar se Ramiz Arifi ende nuk është arrestuar.
Pavarësisht kërkimeve, vendndodhja e të dyshuarit mbetet e panjohur, ndërsa policia vijon hetimet për zbardhjen e plotë të ngjarjes.
Gjashtë ditë pas krimit që tronditi Gjilanin, mbetet pyetja: Ku po fshihet Ramiz Arifi dhe pse ende nuk është arrestuar?
