Gjykata Themelore në Prishtinë ka marrë vendim për caktimin e masës së paraburgimit prej një muaji ndaj ish-deputetit Gani Geci, i cili dyshohet për kanosjen e gazetarit Lirim Mehmetaj.
Vendimi është marrë pas një seance dëgjimore që ka zgjatur gati dy orë në Pallatin e Drejtësisë në Prishtinë, ku është shqyrtuar kërkesa e Prokurorisë për paraburgimin e tij.
Gjatë zhvillimit të seancës, familjarët e Gecit kanë qëndruar në ambientet e Gjykatës, duke pritur vendimin.
Prokuroria ka kërkuar masën e paraburgimit, ndërsa mbrojtja e ish-deputetit ka pasur mundësinë të paraqesë kundërshtimet e saj.
Geci dyshohet se më 11 tetor ka kanosur gazetarin Lirim Mehmetaj në zyrat e portalit “Vox Kosova” në Prishtinë, lidhur me një postim.
Me vendimin e fundit, ish-deputeti do të qëndrojë në paraburgim për një muaj, ndërsa procedurat ndaj tij do të vijojnë.
