Tensione janë regjistruar gjatë protestës studentore në Tiranë, ku deputeti i Partisë Demokratike, Edi Paloka, është përballur me kundërshtimin e protestuesve. Të rinjtë e kanë pritur me thirrjet “Rama në burg, Berisha në burg!”, duke i kërkuar të largohet nga tubimi.
Në pamjet nga protesta dëgjohen studentët që i drejtohen me thirrjet “Ik, ik” dhe “Deputetë të krimit!”, duke shprehur kundërshtimin e tyre ndaj pranisë së deputetit të opozitës. Debati mes Palokës dhe protestuesve është tensionuar, ndërsa të rinjtë kanë këmbëngulur që ai të largohet.
Ky episod vjen në një kohë kur studentët po përpiqen të ruajnë karakterin e pavarur të protestës dhe po kundërshtojnë përfshirjen e partive politike në tubim. Reagimi ndaj Palokës tregon se pakënaqësia e një pjese të protestuesve nuk drejtohet vetëm ndaj qeverisë së Edi Ramës, por edhe ndaj opozitës, së cilës të rinjtë nuk duan t’i lënë hapësirë për të përvetësuar kauzën e tyre.
