Pas anulimit të mbledhjes së zgjeruar të Grupit Parlamentar të Partisë Socialiste dhe kabinetit qeveritar, e planifikuar për këtë të mërkurë në orën 12:00 në Pallatin e Brigadave, masat e sigurisë pranë Kryeministrisë janë shtuar ndjeshëm. Forca të shumta policie janë vendosur përreth godinës, ndërsa në gatishmëri janë vënë edhe makinat ujëhedhëse, në një kohë kur zemërimi i të rinjve dhe protestat kundër qeverisë vijojnë të mbajnë të tensionuar situatën në kryeqytet.
Pasojat e përplasjeve të fundit dhe rikthimi i studentëve në rrugë tregojnë se pakënaqësia nuk është shuar, por po merr përmasa të reja. Është zemërimi i një rinie që ndihet e tradhtuar nga premtimet e pambajtura, e zhgënjyer nga një sistem që nuk i jep mundësitë e merituara dhe e lodhur nga mungesa e perspektivës për një të ardhme më të mirë në vendin e saj. Përballë kësaj situate, pamja e Kryeministrisë së rrethuar nga forcat e policisë dhe makinat ujëhedhëse ngre pikëpyetje të forta: a është kjo përgjigjja që qeveria ka zgjedhur t'u japë të rinjve që kërkojnë ndryshim, apo një shenjë e frikës përballë një pakënaqësie që nuk kontrollohet më me deklarata politike?
Në vend që zemërimi i studentëve të trajtohet si një alarm serioz për problemet e vendit, pushteti duket se po përgatitet për një tjetër përballje në rrugë. Por as policia, as makinat ujëhedhëse dhe as blindimi i institucioneve nuk mund t'i shuajnë shkaqet që i nxjerrin të rinjtë në protestë. Një qeveri që beson te mbështetja e qytetarëve nuk duhet të ketë frikë nga zëri i tyre, por të japë përgjigje dhe të mbajë përgjegjësi. Sepse kur një rini humbet besimin te e ardhmja, problemi nuk është më vetëm një protestë në rrugë, por një krizë e thellë besimi mes qytetarëve dhe pushtetit.
