Ish-deputeti i Lidhjes Demokratike të Kosovës (LDK), Gani Geci, është ndaluar për 48 orë, nën dyshimin për kanosje ndaj gazetarit Lirim Mehmetaj.
Policia e Kosovës ka konfirmuar në raportin 24-orësh se pas intervistimit të të dyshuarit, me vendim të prokurorit, është caktuar masa e ndalimit policor për 48 orë.
Rasti lidhet me një përplasje mes Gecit dhe gazetarit Mehmetaj, i cili ka deklaruar publikisht se është kërcënuar pas një postimi kritik ndaj deputetit të Lëvizjes Vetëvendosje, Fatos Geci.
Sipas deklarimeve të gazetarit, anëtarë të familjes Geci i kishin kërkuar ta fshinte ose ta ndryshonte postimin, por ai kishte refuzuar. Mehmetaj ka bërë të ditur se kërcënimet e pretenduara i kishte denoncuar në polici.
Mbrëmjen e së hënës, Gani Geci raportohet se kishte shkuar pranë ambienteve të Televizionit Dukagjini, ku Mehmetaj po merrte pjesë në një debat televiziv.
Në raportin e Policisë, rasti është regjistruar si vepër penale “Kanosje”, ndërsa hetimet pritet të sqarojnë rrethanat e plota.
Ndalimi për 48 orë është masë procedurale dhe nuk përbën vendim për fajësinë e Gecit.
