Një përmbytje e menjëhershme dhe me fuqi shkatërruese ka goditur zonën e lumit Budhi Gandaki, në distriktin Gorkha të Nepalit, duke marrë me vete banesa, ura dhe pjesë të infrastrukturës. Pamjet që po qarkullojnë në rrjetet sociale tregojnë momentin kur rrjedha e furishme e ujit shemb një urë dhe e tërheq me vete, ndërsa lumi mbushet me baltë dhe mbeturina.
Sipas raportimeve, përmbytja ndodhi në orët e para të së dielës, më 11 tetor. Dyshohet se një rrëshqitje dheu bllokoi përkohësisht rrjedhën e lumit, duke krijuar një grumbullim uji që më pas vërshoi me forcë drejt zonave të banuara. Shkaku i saktë është ende nën hetim.
Bilanci paraprak flet për dhjetëra banesa të shkatërruara dhe disa ura të shembura ose të rrëmbyera nga uji. Mes tyre është edhe një urë që lidh distriktet Gorkha dhe Dhading, ndërsa janë dëmtuar gjithashtu objekte dhe pajisje të projekteve hidroenergjetike.
Të paktën pesë persona, dy gra dhe tre burra, rezultojnë të zhdukur. Ekipet e ushtrisë dhe të emergjencave vijojnë kërkimet, ndërsa qindra persona janë evakuuar ose shpëtuar nga zonat e prekura. Më shumë se 100 turistë të huaj që ndodheshin në rajon kanë mbetur të bllokuar për shkak të dëmtimit të shtigjeve dhe urave.
Autoritetet u kanë bërë thirrje banorëve pranë lumit të largohen drejt zonave më të larta dhe të sigurta. Deri tani nuk raportohen viktima të konfirmuara, por kërkimet vazhdojnë dhe përmasat e plota të dëmeve mbeten ende të paqarta.
Kjo është një tjetër goditje e rëndë për Nepalin, i cili u përball edhe në gusht me përmbytje katastrofike që shkaktuan mbi 1400 viktima.
