Një ngjarje e rëndë ka tronditur fshatin Pogragjë të Gjilanit, ku një 29-vjeçar ka humbur jetën pasi dyshohet se është qëlluar me armë zjarri.
Viktima, i lindur në vitin 1997, ka ndërruar jetë në vendin e ngjarjes, ndërsa autori i dyshuar është larguar menjëherë pas krimit dhe ndodhet në kërkim nga Policia.
Lajmi është konfirmuar nga zëdhënësi i Policisë Rajonale të Gjilanit, Valon Osmani, i cili ka bërë të ditur se ekipi mjekësor ka konstatuar vdekjen e të riut në vendngjarje.
Sipas Policisë, i dyshuari është një shtetas kosovar, identiteti i të cilit tashmë është i njohur për autoritetet. Forcat policore janë vënë në lëvizje për lokalizimin dhe arrestimin e tij.
Policia e Kosovës, në bashkëpunim me Prokurorinë e Shtetit dhe njësitë hetimore, po punon për zbardhjen e plotë të rrethanave të kësaj ngjarjeje të rëndë.
Ende nuk dihen motivet që çuan në vrasjen e 29-vjeçarit, ndërsa hetimet vijojnë.
Një tjetër jetë e re u shua nga plumbat, ndërsa autori i dyshuar vazhdon të jetë në arrati.
