Botëkuptimi i krimit të organizuar u trondit për disa orë gjatë ditës së sotme, pas disa lajmeve alarmante në media se drejtuesi i policisë, Skënder Hitaj, ishte liruar nga detyra. Megjithatë, pas verifikimeve me urgjencë pranë Ministrisë së Brendshme dhe qeverisë, doli se bëhej fjalë thjesht për një Fake News dhe se Hitaj vijon i qetë në pozicionin e tij.
Lajmi i konfirmimit ka sjellë një frymëmarrje të thellë lehtësimi në rrethet e operatorëve të call center-ave klandestinë dhe krerëve të bandave lokale. Sipas burimeve konfidenciale, pas dëgjimit të lajmit të rremë, disa prej tyre kishin nisur të çmontonin pajisjet e investimit dhe të mbyllnin linjat e mashtrimeve financiare, nga frika se pasardhësi i tij mund të merrte detyrën me zell jo të zakonshëm.
"Menduam se mbaroi me aq," u shpreh i përlotur menaxheri i një call center-i me bazë në qendër të qytetit. "Por falë Zotit dhe garancive zyrtare, z. Hitaj është ende aty. Mund të vazhdojmë punën normalisht duke u telefonuar të moshuarve në Gjermani pa pasur frikë nga ndërprerjet e energjisë apo bastisjet e papritura."
Ndërkohë, bëhet me dije se Hitaj, në bashkëpunim të ngushtë me Ministrin e ri të Brendshëm, Ervin Demo, dhe në kuadër të ligjit të ri të Policisë, po vazhdon bashkërendimin e punës për "sigurinë, renditjen e prioriteteve dhe goditjen e krimit", procese që, siç konfirmojnë vetë grupet kriminale, deri tani kanë ecur me një ritëm mjaft komod dhe të parashikueshëm për të gjitha palët.
