Një llogari me lidhje të pretenduara me qarqet e sigurisë në Serbi dyshohet se ka ndjekur prej vitesh aktivitetin e Forcave të Armatosura shqiptare, duke publikuar edhe pamje nga zona ushtarake në Bizë dhe duke monitoruar fluturimet e dronëve Bayraktar nga baza ajrore e Kuçovës.
Analisti i sigurisë, Drizan Shala, ka ngritur alarmin për këtë situatë në një analizë të publikuar nga Tirana Examiner, ku sjell në vëmendje aktivitetin e llogarisë “Dunav Intel” në rrjetin X.
Më 2 tetor, kjo llogari publikoi fotografi të poligonit ushtarak të Bizës, duke i paraqitur si pamje ekskluzive. Në to shihen çadrat e ngritura në terren, mjete taktike dhe godina të vjetra ushtarake. Fotografitë duket se janë realizuar nga një pozicion i ngritur mbi poligon, në një moment kur aty ndodheshin efektivë të Forcave të Armatosura.
Sipas Shalës, vetë “Dunav Intel” pretendon se e monitoron aktivitetin në Bizë prej më shumë se dy vitesh. Krahas kësaj, llogaria ndjek edhe lëvizjet ajrore të dronëve Bayraktar shqiptarë, të cilët operojnë nga baza e Kuçovës, duke regjistruar fluturimet përmes kodeve të transponderëve.
Shala e konsideron këtë aktivitet si pjesë të një përpjekjeje më të gjerë për mbledhjen e informacionit mbi kapacitetet dhe aktivitetin e ushtrisë shqiptare, duke e cilësuar atë si me karakter armiqësor dhe në interes të Serbisë.
Në analizë rikthehet edhe qëndrimi i presidentit serb Aleksandar Vuçiç ndaj bashkëpunimit në fushën e mbrojtjes mes Shqipërisë, Kroacisë dhe Kosovës. Vuçiç e ka konsideruar këtë partneritet si të orientuar kundër Serbisë.
Shala vëren gjithashtu se Serbia ka buxhetin më të madh të mbrojtjes në rajon dhe se vetëm pak javë më parë zhvilloi një stërvitje ushtarake në Peshter, me një skenar të karakterizuar si sulmues.
Ndërkohë, një zyrtar i lartë i mbrojtjes i ka deklaruar Tirana Examiner se problematika është e vazhdueshme dhe se Shqipëria aktualisht nuk disponon kapacitete të mjaftueshme antidron për të përballuar këtë lloj monitorimi apo kërcënime të tjera të ngjashme.
Kjo çështje merr një tjetër dimension për shkak të hetimit të SPAK në Ministrinë e Mbrojtjes. Sipas Tirana Examiner, në qendër të hetimit është edhe një procedurë prokurimi për një sistem antidron, pikërisht teknologjia që do të mundësonte zbulimin dhe neutralizimin e dronëve mbi zona të ndjeshme si Bizë dhe Kuçovë.
Megjithatë, botimi thekson se informacioni mbi aktivitetin e llogarisë serbe nuk buron nga dosja hetimore e SPAK.
Shala ngre ndërkohë shqetësime edhe për mënyrën se si informacionet nga hetimi kanë përfunduar në media. Ai thekson se që në ditën e parë të publikimeve u bënë të ditura të dhëna të tilla si numri i dosjes, kontrollet personale dhe lloji i dokumenteve të sekuestruara.
Sipas tij, dokumentet që lidhen me një çështje të tillë duhet të trajtohen nën sekretin hetimor dhe nga persona të pajisur me certifikatë sigurie, ndërsa burimi i rrjedhjeve të informacionit duhet të hetohet me të njëjtën seriozitet si vetë procedura e prokurimit.
Analisti nuk pretendon se aktiviteti i llogarisë serbe, hetimi në Ministrinë e Mbrojtjes dhe rrjedhjet e informacionit nga dosja e SPAK janë të koordinuara mes tyre.
Por paralajmërimi i tij mbetet i fortë: ndërsa aktorë të huaj duket se po mbledhin informacion mbi aktivitetin ushtarak shqiptar, Shqipëria përballet njëkohësisht me dobësi në mbrojtjen antidron dhe me rrjedhje të të dhënave sensitive.
“Punën e armikut po e bëjmë vetë”, është përfundimi i Shalës.
