Kompozitori Adrian Hila është marrë në pyetje në Policinë e Tiranës nga grupi i posaçëm hetimor i Krimeve Kibernetike, lidhur me publikimin dhe shpërndarjen në rrjetet sociale të videove intime me disa artiste të njohura. Autoritetet po hetojnë rrethanat e regjistrimit dhe publikimit të materialeve.
Sipas deklarimeve të raportuara, Hila ka pranuar se kamerat në banesën e tij janë vendosur prej tij në vitin 2022, por ka mohuar se ato janë instaluar me qëllim regjistrimin e momenteve intime. Ai ka pretenduar se kamerat shërbenin për sigurinë e pronës, pas rasteve të vjedhjeve në zonë, dhe se funksiononin online pa memorie për ruajtjen e pamjeve.
Ndërkohë, Krimet Kibernetike po hetojnë mënyrën se si videot kanë përfunduar në rrjet dhe po identifikojnë adresat IP të profileve që i kanë shpërndarë. Pritet gjithashtu ekspertimi i sistemit të kamerave për të verifikuar nëse ka pasur ndërhyrje të paautorizuara. Sipas raportimeve, për t’u pyetur pritet edhe gazetari Elton Tozaj, ndërsa hetimi vijon për zbardhjen e plotë të rrethanave.
